Свята Дзень выратавальніка лічаць сваім не толькі супрацоўнікі МНС, але і АСВОДа. Усіх прадстаўнікоў гэтай мужнай прафесіі вызначаюць высокае пачуццё адказнасці, адданасць любімай справе і высокі прафесіяналізм. Чым жывуць выратавальнікі сёння? Якімі клопатамі напоўнены іх працоўныя будні? Аб гэтым мы даведаліся, наведаўшы выратавальную станцыю.  

 

 

Зэльвенская выратавальная станцыя сярод дзесяці аналагічных станцый Гродзенскай вобласці на працягу некалькіх апошніх гадоў лічыцца лепшай. Калектыў выратавальнікаў складаецца з 10 чалавек: гэта вадалазы, матарысты, медсёстры. Кожны дзень, згодна з раскладам, на дзяжурства заступае чарговая змена, якая кантралюе акваторыю вадасховішча, праводзіць вучэбныя спускі пад ваду, рамонт катараў, лодак і іншага выратавальнага абсталявання. У выпадку ўзнікнення небяспечнай сітуацыі выратавальнікі гатовы тут жа аказаць неабходную дапамогу.  
Начальнік станцыі Аляксандр Бойка адзначае:
– Зэльвенскі раён пакуль адзіны ў вобласці, дзе не адбылося гібелі людзей на вадзе. Гэтаму садзейнічала якасная прафілактычная работа, праводзімая сярод адпачываючых, ва ўстановах адукацыі, працоўных калектывах, а таксама высокі прафесіяналізм выратавальнікаў, дзякуючы якім ў мінулым годзе было папярэджана 89 няшчасных выпадкаў на вадзе.
У калектыве трое вадалазаў першага класа – Аляксандр Бойка, Аляксандр Марцута і Віталь Янулевіч, двое – Сяргей Конік і Юрый Ляскевіч– другога класа. Усе яны ўмеюць працаваць у складаных падводных умовах, маюць, адпаведна, не менш за 1000 і 500 гадзін работы пад вадою. На рахунку гэтых мужных мужчын дзясяткі выратаваных чалавечых жыццяў, праведзеных пошукавых і падводна-тэхнічных работ. Выратавальнікі заўсёды працуюць у камандзе: вадалаз апускаецца на дно, двое страхуюць на паверхні. Таму тут, як нідзе, важная згуртаванасць у калектыве, добрыя адносіны паміж калегамі і паразуменне. Ветэраны ахвотна перадаюць свой багаты вопыт маладым спецыялістам. За кароткі тэрмін паспяхова асвоіў выратавальную справу вадалаз трэцяга класа Алег Баравы. У належным тэхнічным стане падтрымліваюць плаўсродкі матарысты Алег Хадоўскі і навічок Анатоль Макарэвіч. Свой высокі прафесіяналізм ужо больш за дваццаць гадоў дэманструюць медсёстры Ніна Шчамялёва і Валянціна Булак. Усе выратавальнікі пры за-ступленні на дзяжурства і перад кожным па-гружэннем праходзяць медыцынскае абследаванне.
Выратавальнікі падтрымліваюць цесныя кантакты з супрацоўнікамі РАУС, РАНС, райінспекцыі прыродных рэсурсаў і аховы навакольнага асяроддзя, міжраённай інспекцыі аховы жывёльнага і расліннага свету.
Наведванне выратавальнай станцыі ў чарговы раз падштурхнула да думкі, што гэта праца толькі для сапраўдных мужчын. Яна не такая рамантычная, якой уяўляецца большасці з нас. Тым не менш, усе, хто прыйшоў у гэтую прафесію, лічаць, што свой прафесійны шлях яны абралі правільна.

Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.