“Жыццё пражыць – не поле перайсці”, – сцвярджае народная мудрасць. Узнагародай за сумленна пражытае жыццё з’яўляецца добрая памяць у сэрцах многіх людзей. Дзеля гэтага не абавязкова здзяйсняць подзвіг. Дастаткова быць шчырым, адкрытым, прыязным. Ірына Іосіфаўна Стасевіч, настаўніца гімназіі №1 г.п.Зэльва,–менавіта такі чалавек. Яна высокакваліфікаваны спецыяліст, сябар і дарадца дзяцей, ды і проста цудоўная жанчына-маці.

 

 

 

Ірына Іосіфаўна–былая выпускніца фізічнага факультэта Гродзенскага педінстытута імя Я.Купалы. Яна ўдзячна лёсу, што пасля заканчэння вучобы трапіла на Зэльвеншчыну, у дружны, згуртаваны калектыў настаўнікаў-аднадумцаў Старасельскай базавай школы. Тут пад мудрым кіраўніцтвам Таісіі Арсеньеўны Зянько, якая па-мацярынску, з любоўю і цярпеннем прыходзіла на дапамогу ў цяжкія хвіліны няўдач і расчараванняў, удасканальвалася, шліфавалася педагагічнае майстэрства маладой настаўніцы.
Затым была праца ў Конненскай і Бародзіцкай базавых школах. Настаўніца ўжо сама перадавала свой багаты вопыт маладым калегам. Жыццё было насычаным, цікавым, разнастайным. На ўсё хапала часу: на ўрочную і пазакласную работу, бацькоўскія сустрэчы і сходы, самаадукацыю і чытанне кніг мастацкай літаратуры. У гэтых школах побач з ёй больш за 20 гадоў давялося працаваць і мне. А цяпер, вось ужо амаль на завяршэнні сваёй педагагічнай дзейнасці, мы зноў побач, але ўжо ў гімназіі №1 гарадскога пасёлка.
“Калі настаўнік спалучае любоў да справы і вучняў, ён сучасны настаўнік”, –пісаў Л.М.Талстой. Гэтыя словы поўнасцю характарызуюць І.І.Стасевіч. Яна заўсёды ў пастаянным пошуку. Вялікую ўвагу ўдзяляе развіццю творчых здольнасцей сваіх выхаванцаў, якія неаднаразова станавіліся прызёрамі і пераможцамі раённых алімпіяд, былі ўдзельнікамі абласных. Працоўны шлях настаўніцы адзначаны Ганаровымі граматамі абласнога ўпраўлення і раённага аддзела адукацыі.
34 гады свайго жыцця прысвяціла настаўніца школе. Ураджэнка Мастоўшчыны, Ірына Іосіфаўна палюбіла славуты зэльвенскі край, вырашыла звязаць сваё жыццё менавіта з ім.
Не скардзіцца жанчына і на свой лёс. Разам з мужам Мікалаем Іванавічам выхавалі сына Андрэя, які, як і маці, закончыў Гродзенскі дзяржаўны ўнівер-сітэт імя Я.Купалы. Жыве і працуе ў горадзе Ліда. На радасць усім падрастае ўнук Арцём.
З нагоды юбілею хочацца пажадаць Ірыне Іосіфаўне моцнага здароўя, творчай і самаадданай працы, радасці, дабра, здзяйснення ўсіх мараў, асабіс-тага шчасця.

Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.