Добры падарунак напярэдадні калядных свят атрымалі школьнікі раёна. У чароўным лясным куточку са шматгадовымі соснамі, гаючым паветрам, прыгожым вадасховішчам на тэрыторыі аздараўленчага лагера “Блакітная хваля” адкрылася рэзідэнцыя ляснога гаспадара.

  

 

Адкрыццё прайшло ў выглядзе свята “У гасцях у казкі”. Уваход на тэрыторыю рэзідэнцыі стылізаваны пад браму ў сярэднявечным горадзе. Першымі гасцей сустракалі Баба Яга і Кікімара, якіх трэба было добра папрасіць аб тым, каб яны прапусцілі ўнутр. Затым эстафету ў іх падхапілі любімыя навагоднія персанажы Дзед Мароз і Снягурка, якія запрасілі ўсіх гасцей на свята. А там рознакаляровымі агеньчыкамі свяцілася лясная прыгажуня-ёлка, гучала музыка, чуўся смех дзетвары. Шчыра вітаў усіх прысутных Лесавік. Арганізатары святочнага мерапрыемства паклапаціліся аб тым, каб стварыць святочную атмасферу для гасцей. Дзецям тут было сапраўднае раздолле! Адны вадзілі карагод вакол ёлкі, другія прымалі ўдзел у вясёлых і цікавых гульнях і конкурсах, арганізаваных для іх работнікамі цэнтраў творчасці дзяцей і моладзі, турызму і краязнаўства, ДЮСШ. Кожны змог знайсці занятак па душы. Вучні школ дэманстравалі спрыт на турыстычнай і веласіпеднай паласе, у гульні ў хакей і гарадкі, трапнасць – у стральбе з пнеўматычнай вінтоўкі і кіданні дроціка, эрудыцыю – на “Полі цудаў”. Многія з хлопчыкаў і дзяўчынак з цікавасцю знаёміліся з экіпіроўкай і зброяй, якой карыстаюцца супрацоўнікі міліцыі. Супрацоўнікі раённага аддзела па надзвычайных сітуацыях разам з Лесавіком правялі для школьнікаў віктарыну па правілах пажарнай бяспекі. Баявы разлік пажарнага выратавальнага паста вёскі Каралін прадэманстраваў баявое разгортванне і тушэнне вогнішча. 
Арганізатары паклапаціліся аб тым, каб госці маглі падсілкавацца: у фітабары санаторнай школы-інтэрната жадаючыя маглі выпіць гарачага духмянага чаю з лекавых раслін, а ў гандлёвай палатцы купіць розныя прысмакі. На памяць аб праведзеным у рэзідэнцыі дні дзеці набылі сувеніры, зробленыя з прыродных і штучных матэрыялаў – іх прапаноўвалі работнікі Дома рамёстваў. Завяршылася свята феерверкам.
Па шчаслівых і радасных тварах соцень дзяцей было бачна, што мерапрыемства атрымалася. І кожны з дзяцей выказаў пажаданне вярнуцца ў гэтае казачнае царства яшчэ неаднойчы.
Дырэктар аздараўленчага лагера “Блакітная хваля” Святлана Мікуцік расказала пра стварэнне рэзідэнцыі і перспектывы далейшага яе развіцця:
–Мы стараліся адкрыць рэзідэнцыю ляснога гаспадара ў час зімовых канікул, каб школьнікі цікава, з карысцю правялі свой вольны час. Работы пачалі ў лістападзе, у асноўным вялі іх гаспадарчым спосабам– сіламі работнікаў лагера, гаспадарчай групы і ўстаноў раённага аддзела адукацыі. Многія з іх аказа-ліся сапраўднымі майстрамі: рэзідэнцыю ўпрыгожылі арыгінальныя казачныя кампазіцыі з дрэва. Будынак на стадыёне пасля праведзенай рэканструкцыі стаў падобны на казачную. сядзібу. Тут створаны пакой для Бабы Ягі, а ў перспектыве размесцяцца яшчэ і пакоі іншых лясных гаспадароў.
Свой уклад у стварэнне рэзідэнцыі ўнеслі многія сельскагаспадарчыя прад-прыемствы раёна. СВК “Караліно” і “Сынкавічы”, ПСУП “Князева” дапамаглі фарбай, СВК “Галынка”– дрэваматэрыяламі. Работы па далейшым развіцці рэзідэнцыі будуць працягнуты. Плануецца павялічыць колькасць размешчаных на тэрыторыі прыгожых казачных кампазіцый з прыродных матэрыялаў. Думаю, у гэтай справе нам дапамогуць гурткоўцы цэнтра творчасці дзяцей і моладзі, а таксама навучальныя ўстановы.
Наша задача – зрабіць так, каб лагер “Блакітная хваля” дзейнічаў пастаянна: летам дзеці будуць праходзіць тут аздараўленне, а ўвесь астатні час года–удзельнічаць у спецыяльна арганізаваных для іх забаўляльных мерапрыемствах.

Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.