З 12 студзеня па 1 лютага 2012 года ў Нацыянальным дзіцячым адукацыйна-аздараўленчым цэнтры “Зубраня” праводзіцца другі (фінальны) тур творчага конкурсу па падтрымцы юных вакалістаў “Звонкая раніца-2”. Мэта конкурсу–падтрымка таленавітай моладзі краіны, папулярызацыя творчасці маладых выканаўцаў, развіццё сама-дзейнай творчасці, дэманстрацыя дасягненняў работы педагогаў рэгіёнаў.

 

У конкурсе прымаюць удзел юныя вакалісты – вучні 7–10 класаў сярэдніх агульнаадукацыйных устаноў ва ўзросце 13–17 гадоў, якія маюць вакальныя даныя. Сярод удзельнікаў і наша зямлячка – Крысціна Чура, вучаніца 8 «А» класа СШ №3.
Спяваць Крысціна любіць з дзяцінства. Вакальныя здольнасці дзяўчынкі заўважыла ў 2 класе настаўніца Ірына Хлапоніна, якая садзейнічала раскрыццю яе таленту. У 4 класе Крысціна стала наведваць гурток спеваў пад кіраўніцтвам Вольгі Саўко у раённым Доме культуры, удзельнічаць у раённых канцэртных праграмах.
У скарбонцы дзяўчынкі мноства ўзнагарод за ўдзел у школьных, раённых і абласных конкурсах выканаўчага майстэрства, конкурсах чытачоў і інш.
На сцэне Крысціна дэманструе не толькі высокае выканаўчае майстэрства, але і “запальвае” залу сваёй энергіяй і дорыць радасны настрой. Цяпер яна вучыцца ігры на гітары ў дзіцячай школе мастацтваў. Да дасягнутыя поспехі ў творчай дзейнасці Крысціна ўзнагароджана Пахвальным лістом раённага выканаўчага камітэта.
Дзяўчынка–вельмі жыццярадасная, камунікабельная, энергічная, любіць падарожнічаць.
–Аб конкурсе “Звонкая раніца-2” я даведалася з “Настаўніцкай газеты”,–расказвае Крысціна.–Бацькі прапанавалі паспрабаваць прыняць у ім удзел. Я доўга вагалася, сумнявалася ў сваіх сілах, ведала, што ў праекце будуць праяўляць сябе лепшыя з лепшых юных спевакоў рэспублікі. Але вырашыла: калі ёсць такая магчымасць, абавязкова трэба ёю скарыстацца. У якасці музычнай кампазіцыі выбрала песню з рэпертуару легендарнай групы “Бітлз”. Кастынг праходзіў у г.Масты (адбор лепшых выканаўцаў быў ў 12 райцэнтрах краіны). На падставе відэазапісаў выступленняў усіх канкурсантаў журы з 267 таленавітых хлопчыкаў і дзяўчынак выбрала 50. У іх ліку аказалася і я.
Фіналістаў у Нацыянальным адукацыйна-аздараўленчым цэнтры чакаюць заняткі, якія правядуць педагогі па вакалу, харэаграфіі, сцэнічным руху, макіяжы і тэхніцы маўлення. Таксама адбудуцца сустрэчы з зоркамі эстрады і вядомымі людзьмі.
Конкурс “Звонкая раніца-2”, лічыць Крысціна, дае цудоўную магчымасць атрымаць новы вопыт, павысіць сваё выканаўчае майстэрства: слушныя заўвагі прафесійных спевакоў і педагогаў лішнімі не будуць нікому.
Відэаролікі выступленняў фіналістаў конкурсу “Звонкая раніца-2” будуць даступныя для прагляду ў інтэрнэце. Шляхам СМС-галасавання кожны жадаючы можа падтрымаць таго юнага спевака, выступленне якога спадабалася найбольш. Давайце разам прагаласуем за нашу зямлячку!

Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.